Смешивание оленей из разных стойбищ, нападение на стадо волков или песцов, бескормица, падёж – явления, которые появились в тундре не вчера и даже не 10 лет назад. К ним лишь прибавился человеческий фактор в виде строительства и освоения месторождений. А природные катаклизмы всю жизнь идут рядом с кочевниками. Возможно, для того, чтобы житель тундры сегодня не расслаблялся в век современных технологий, а гордо нес своё имя – оленевод!
Тэраӈгова, ярколава, тыма, ты” паддева, пивня ядэрти’ танява, нохо’ тэхэ’ харвава, илебця” ты ханабава. Тарем’ им’ ӈэдараб’ илева’ ямбан’ выӈгана тарця’ сер” танявы”. Теняна ӈадимы сер” ни”ӈа”, теда’ ӈадимы вада” вуни”ӈа”. Ӈодь’ ненэць манзаямда хаселабтаӈгу, ӈодь хардахана мале пон’ мэӈгу, тыда ханда”. Хой’ тер” хардахана пон’ мэванзь таславы вуниӈа. Пыда ты” илам’ тэравы. Ӈодь’ луци” мутри сянакуць пяӈгу, тыда ханда”. Тедахав’ хойняна хуркари” ты’ илам’ пуня’ пэртя” ӈамгэри” ӈока”: телевизор”, телефон”, хуркари сянако”, тикыд мэ”мари’ то”олха”. Тикы сянакутаханда ты пэртя тыта нямна юрхалъй, вэванё’! Ты пэртя ӈоб’ нерня’ тыта илам’ минребта тара”нив’, тикахана ты пэртям’ нюбета!
Нина Окотэтто хасава нюнда ня’ пудана сян сыра’ харад’ няю” ёнда турӈаха’. Та’ ӈэрм’ няю” мюсе хэсеты”, сельбя’ няна пуня’ тэворӈа”. «Илева’ ямбан’ тэраӈгосетыва”, ил’ тарем’ таславы ниӈа. Хасава” ярколаӈгу”, не” нидо’ нядабаӈгу”. Ям’ савада ненэця” мюсе”. Ӈопой яхана хасенаб’, я сусаӈгу, ты” ӈамнда няда юӈгода».
– Илева’ ямбан’ ненэця” мюсярмы”, – Ярэча ири ма, пыда теда хардахана иле. – Ӈавна мань пухуцяни’ нисяи ӈэрм’ няцей мюсе тось. Сеяха’ хэвхана салаба по ӈэвы, ненэця” тэсялмы. Сэрпива вэсако ӈэрм’ няю” тыта сава яд пюсь товысь, сырамдо’ таняна мададось. Тыдо’ иле вудомаць. Хусувэй хибя мая’ нерня’ сырпата тара, илеван’ харванахав’ тарем’ пэрӈада.
Выӈгана илена ненэць мюсерманзь таславы. Тыта ӈаманда нядад пюсь несэй ян’ ямдаӈгу”. «Нито’ я хадопи”, нито яха’ ӈэсурӈа”, тарехавм’ ӈани’ вэва ӈэдакы, – Людмила Окотэтто ибедорӈа, пыда Сеяха выӈгана иле. – Тедахав’ ям’ хулцопада пидеця” ӈокма”, ненэцяи” ты” хадырць ё марпи”. Тарем’ хой’ тер” ӈахат иле”мяхататто’ нензхалаӈга”, нито’ мюслаби ханаби”».
Андрей Хоротэтто, Тамбей хой’ тер: «Ты” илева’ ямбан’ ӈобт’ ӈоворна”. Ил’ ӈэ”нив. Нум’ иринд тарем’ таславы ниӈа. Ненэцяи” тыто’ нёховаб’ ядэр”, ӈамгэм’ пэрта”? Ӈопой яхана ӈамдёда”, енар” манзаядо’ юӈгода. Яркола”, тэраӈгу”, ӈэдалы”, тынзям’ ня”амба тенева”, тедахав’ манзаядо’ ӈока. Маня” 40 вата тына” тэрабасетыва”. Ярколава нюрцмь ӈэсеты. Мяк’ турта” тута”ма, пон’ нивы маниевы нид манэтанава, яркола ныхымд манэтанава. Савовна тэраӈго тарава, нись поёмбю’, тэкоцид вэнсер” вунин пэрт’. Ню” нисянадо’ мание”, ӈобтарем’ тынзяӈодо’ ня”амсеты”, тэраӈгоди” помна ядэрта”. Ӈацекы” ӈарка няхато’ сыраць илам’ тохоламби”». Андрей’ пухуцянда ня’, ӈацекыти ня’ 250 тэдо’. Ӈани сямян я’ тер” тотрев’ тыдо’ ӈани тэхэ’ тэворӈа”, тэраӈгосеты”. Тэраӈговам’ тоянана манзаяӈэ нидо’ пэр”. Вэсакохо’ пухуцяха’ невхы иринати’ тотрев’ тэхэна мюсеӈаха’. «Тэхэна ӈэдалёва, ямданава ихина сава, сёнзянд мюй сибюворӈа, сей таӈга, – Андрей ма. – Мюхуна несэй нютнам’ тохолаӈгун. Тад хуняна ненсадалаӈгодан. Тикар ёльце саванё”! Манзьвани’саваӈэ тасламбими’. Теда ненэцяи тыдо’ хаӈга”, ӈадъбято’ буранахана мюсе”.
Тарем’ индя ядан’ ибедорць ты пэртя лаханакурнась. Тарем’ индя ядан выӈгана иленам’ мание, сей таӈгворна, маямбада то”олха. Хусувэй хибя’ харта иланда нив’ ӈа’, хусувэй хибя харта иланда харта нерня’ минреда. Иланд’ тэянам’ Нум’ ири тасиримня нядабадакэда, нядабабта савава! Нув’ няд хамэдёда ӈамгэм’ ӈатеняхав сава иланд’ ни’ тэваӈгу’, ӈопой яхана ӈамдёда, луца’ мутры мэта, тыта нямна идя вуни ӈэӈгу’, тыда харто’ ядэрта”. Тарем’ вэва’ то”олханё! Хусувэй яля’ ма”алкода, хусувэй яля’ тыда манэсарта, мята манзаи пэрта.
– Мани’ тэкоцини’ етри’ маниесетыни’. Ӈацекыни” нарма”, мал” тохолку”. Вэсакони’ ня’ сидяӈэ тыни’ ма”ламбсетыни’. Мань яда ма”алковам’ харобтам’. Якоцянд нимня ядаӈгун, ир тэри сибё ӈэӈгу. Я”амна сыртан. Тыни’ си”ми савовна тенева”. Мань си”ми манэ”мандо’ сер”, харто’ мято’ няю” санасетыд”. Вэнекоми’ хэвханани ядсеты. Хараси’ вэнотаӈгова серм’ нив харобта. Выӈгы илам’ ёльце хамзав, – Олеся Окотэтто лахана, пыда илева выӈгана иле.
Хардахана илена ӈэбта, выӈгана илена ӈэбта, ӈобтикы нив’ӈа. Ненэць харта нерняку’ ни ӈэӈгу, ситя хибя нерня’ нюхулеӈгу? Иланд’ табедамбувнда” – ӈацекы”, ти’ мэна”. Ӈацекы”, нер” мава”цянё”, ӈарка ненэцяӈг’ сырна”, хурка илам’ нисянадо’ небянадо’ манэлабтамби”, тарем’ илеӈгу”.
Антонина Серасхова
