Вэба’ иры ваера. Вы’ ний сыра’ ха”амвам’ ӈате. Нюртей сыра си”ив яля’ тяхана мале ха”мыць, тадри ӈани’ холкась
Нув’ сармик” марнасавэй’ ядембада яха” хаяць. Хой’ тер”, хэвы ядембадам’ тензебтемба, сырэй ханхато’ тэво”та”, тадри таӈы панэцидо’ тадаӈгудо’. Хардахана илена” ӈобтарем’ тэри ни’ мэ”. Луца’ манзъям’ минрена” манзра”, сэдорана” сэдора”. Мал” ненэця” тад тованда сыра’ яляха” хамеку”.
Вэба’ иры мале ваера. Тохолкода” ӈацекы нюртей ирыдо’ сянмбой’ хая. Тикы ялэ” ямбан’ намднадо’ ӈока, манэ”тадо’ тня. Тюкы’ по’ тохолкованзь товы ӈацекы небой поход ӈокамбой. Тэри ӈамбцата тет нюртей’ по’ тохолкоди” класс”, сидя юдемдей класс, тад ӈопой пуда тохолкоди” группа. Школахана манзрана” хуркари мероприятия сертаби”.
Тандъярка’ концерт ӈась. Нюмда «Пусть всегда будет солнце». Тикахана тохолкода” ӈацекы” воспитательто’ ня”, учительто’ ня” хуркари сава сё хамедавыць, тра теневана” траць. Тикы ӈарка праздник вэба’ иры’ 30 яля’ няю” таславы. Россия яна’ параӈода Владимир Путин небой’ по’ падар” ни’ пид”темямда ӈабтавы. Донецкой няби Луганской Народной Республикаха’ тад Запорожской няби Херсонской областьха’ теда’ Россия’ пеляха’. Концертан’ товы” мят’ тювандо’ е”эмня есям’ салтамбиць. Тикы еся” саю питарпади нядаба благотворительной фондан’ ханда”, нюмда «МЫВМЕСТЕ». Вэба’ иры’ ямбдан’ Сёяха’ харад’ тохолкова мякна учитель”, воспитатель” тамна хуркари мероприятия сертаби”. Тохолковандо’ хавна ӈацекы” хусувэй яля’ пэртядо’ ёльце ӈока.
Тандъярка’ школахана физкультурам’ пэртя Иван Окотэтто няби СОК «Айсберг»’ манзрана Руслан Яптик соревнования сертабихинзь. Хибя харва сюрберць нертеӈгурнаць, легкоатлетический бегм’ мэ” ӈаць. Ӈокханда тет дисциплинась: 14 пон’ тэвувдавэй хасава ӈацекы” няби не ӈацекы”, тад ӈарка ненэця”: не”, хасава”. Хусувэй группахана сюрамбавы сидя юкадвата ӈэвы. Не ӈацекы”, хасава ӈацекы” 1,5 километран’ сюрамбиць, ӈаркамбой’ хасава” 3 км, не” ӈобтарем’ 1,5 км сюрамбиць.
— Тюкы’ по’ ӈарка не” поӈгана сюрамбидм’. Няха”тани’ мере”медм’. Ёльце маямбидм’, тэри сава. Ӈабцата хойняна соревнования” ӈани’ танясеты”. Тикахана мале сян местам’ ханасетым’. Ӈабцата нябимдейӈэ тэв”мами’ таня, няхаромдэйӈэ тэв”мами’, теда’ нюртей местами’ танява. Мань нидам’ тоса’, тамна я”авла сюрамба пир”мэв, тэри савов, — Катя Окотэтто ма, пыда сюрамба нехэт мере”ӈась.
— Тюкы яля’ сюрамбада ӈокась, тэри сава. Хусувэй дисциплинахана сидя юкадвата ненэць”. Ӈули ӈокханда 80 сюрамбавы ӈэвангабя. Нумда тэри сава, сюрамбавари’ то”олха. Иван Игоревич’ ня’ ӈацекы спортан’ тохоламбини’. Нямэркахана интернат’ хэвувна сюрберӈаваць, хан санарпасетыва”, ярколасетыва”. Маня” хамекува”. Ӈани’ яляхана хуркари районный, окружной соревнования’ ӈэванда”, хамедё тара, — Руслан Яптик ма, пыда СОК «Айсберг»’ спортивный инструктор.
Сёяха’ харад янамбовна сырэй ялэ ӈате. Манзрана” та’ ямбан’ харад’ мюйм’ хабтумдамбиць, тахабэй ӈамгэри сулорпиць. Сехэры салмраць, мерця’ пулабтавы харад ядхы еся лабэс яхандо’ мэйрамби”, подъезд’ мюй, харад’ нё’ си сертабиць, сеня’ мюй ӈоляпяхана масарпидонзь. Та’ ямбан’ манзрана” етри” манзра”.
Нюртей сыра си”ив яля’ тяхана мале ха”мыць, тадри ӈани холкась. Харад’ тер”, хой’ тер” сыран’ ӈули” маидаць. Я’ ний таминда хабтумась. Тедахав’ етри” сарё”, я’ нийкако тэри са”нюй. Ты пэртяха”на тояна. Мя” са”нюй, мальця”, паны” савовна тыра я”мадо’. Мяд’ мюй якэ, са”нюй пя” тыраван’ ни” харва”.
— Хэвы’ та’ ёльце ядембисей. Сарё юӈгусь. Яха” хасаць. Ӈани’ похо’ манэць тоянаркась, тэхэ”на ядембива, ненэцяӈгана ядембива. Тедахав’ етри’ сарё”. Хусувэй яля’ сарё. Я’ ний са”нюй, ӈамгэри” са”нюй”, пя” са”нюй”. Тад мерця, етри я”авлада мерця посна. Маня” хойняна янамбоковна сырэй’ няю” хамекува”, ханха”на миӈава”. Сырава’ ӈатева”, са”нюй вэльцёйӈэ ядэрць тояна. Тадри ханимданакы, — Мария Тусида тарця вади Сёяха’ хойняд ӈэдарась.
Нув сармик марнасавэй ядембада яха” хаяць. Пыдо’ харад’ нимня, хой’ мядо’ нимня, ӈарка Ямал’ нимня ӈопой марнадо’ «Лык-лык-лык!» — «Ӈани понда ӈэсонд!» Ненэй ненэцяи” яля’ падаркана хор” иры миӈа. Иры’ минюйда лабаравысь.
Та’ ямбна’ Сёяха’ хардан’ ту’ ӈано” тэворна”, ӈавар минре, строительный материал, бензин, ту’ пя, мяд’ мюня тарана ӈамгэри. Тандъярка харад’ тер” сыра’ ӈаврадамдо’ тэмдабиць: картошкы” пад”, лук” ӈэдакы”, морковь”, капуста”, тад’ тамна хуркари ӈавар” тэнз. Салаба’ тоярма’ ӈэсонд’ Сёяха’ тер” ховандадо’ юӈгу. Ӈадъбято’ хусувэй’ по’ тарем’ ӈокамбовна ханабасеты”. Хусувэй лабкахана хуркари ӈавар’ тэнз, тедахав’ тянюмяць. Сырэй ялэ’ ӈэсонд ненэця падаркана ӈока ни хаю”.
(перевод)
По лунному календарю, которому следуют ненцы, прошёл «месяц листопада» и уже идет третья неделя «месяца гона быков». Первый снег уже порадовал сеяхинцев, земля с нетерпением ждёт зимнего одеяния. Перелетные птицы длинными караванами пролетали над Ямалом, прощаясь до следующего лета. Жители тундры, как и селяне с нетерпением ждут наступления зимы, когда не будет слякоти и сырости. Тундровики, вспоминая необычайно жаркое лето, вместе с чумом готовятся переодеваться в зимние наряды и запасаются, как сеяхинцы, на долгую и холодную зиму припасами. А у школьников и дошколят своя насыщенная жизнь, педагоги не дают скучать, с удовольствием развивая подрастающее поколение сеяхинских ребят.
Антонина Серасхова
