Танда ваера, хурка ӈэвакы?

      Нямыхы вада’ пудана. лахарё нерденя пеля № 46 ӈа.

Харе’ манзая’ тэнз’ юӈгоб’, ӈамгэ пэрап’ сава ӈэдакы? Тад тарси’ ненэць ӈудасавэй, манзара харбё, мята тер” ӈавла тара”ма. Ӈоб’ нява Евгения Вануйто тенева. Пыдахой’ тер” лаханакурць ня”ӈась. Хэвы сидя по’ ямбдан’ Ямальский районхана ӈопой юркадвата мат” ю” ненэцянд’ манзаям’ми”мы. Тикыд харто’ ты пэртя” ненэця”,

ханяӈыд харад’ тер”, ӈанид тэсипой’ хаёвы”. Манзаямдо’ сертадо’, недъбям’ ня”ма”.

Антонина Вануйто, пенсияхана мэна,

Новый Порт’ выӈгана илена: «Тюкы яля’ ӈока савам’ ваде”ӈава”. Ядэрта не манзаям’ ваде” ӈа. Мяд’ еям’ сэдангува”, недъбям’

мита, ненэй паны ӈэбтано’, мальця. Тикар саванё’. Мань нюху”ни’ вадетав. Мань ӈавна тэва” мале ӈокась. Ярото’ хэвхана илева’

иледм’. Тына” ӈоб’ сава ӈэсеты”. Нядава’ ӈули” тянюмя. Ӈавна 400 тэваць. Тедахав’ 50 хаи. Мань выӈгы ила’ хавна ӈани’ илам’

ехэрадм’, ним’ харва’. Хойняна илеван’ харвадм’».

Маня” ты пэртина илесь яхана няданда тяню ӈэвам’ Ямал’ тиӈгэвна, хардаха”на, выӈгана, пирця мяк”на, таӈоцяха”на ӈобри’

ваде”ӈадо’. Няда суса, ты” хадырць я тянюмданна, ты” ӈокамданна, ям’ хулцопада” ям’ тахабтамби”, хуркари” вада”, хурка-

ри” мун”. Хусувэр харта теневабцомда ваде”ӈа. Ханяӈы” ты пэртя” недармидо’ яӈгамдавы”, ӈанид таслахая’ тыдо’ лэтамбидо’, тамна ханяӈы” ясялворӈа”, тоянана похо”на тэси’ хаюрӈа”. Ӈоб’ то”оласадрев’ ил’ ни мий’.

Николай тадибе, харта ты пэртя,

Яптик Саля’ выӈгана илена: «Тама’ теда’ савасе. Ханяӈы” тына” хаця мэда. Выӈгана нохо ӈока. Тикыд ты сяторпи”. Суюна” мал”

ӈа-мыдо’. Теда’ ӈобкарт суюва’ юӈгу. Ӈарка тына’ нылэйдаць, сава”. Мюсева’ пирувна тына’ таня”. Ты”на” юӈговы ӈэб’, вуньсява

мюсярт’, нисявам’ нядэӈгу”».

Татьяна тадибе, харта ты пэртя,

Яптик Саля’ выӈгана илена: «Тына’ ӈа-

дивни”сям’. Теда’ ӈани’ хаӈга пэ”нидам’. Ӈавхы’ похо”на маня” мя”на’ тер” тэдо’ ӈока ӈэвы, пуна тянюмы”. Тад пуна вадёвы”. Нум’ хуркари ӈэсеты. Ты” ил’ ӈумгад пере. Нум’ хурка ӈэӈгу, я’ тарця ӈэӈгу. Теда’ маси тына” ӈани” вадёданакы”». Хэвы нара’ Ямальский районхана ты” ӈокавна хаць. Агропромышленный комплеск’ манзарана”, тад ӈэрм’ ям’ тохоламбада”, ты” лекар” ӈэвахана ӈамдёда” тарем’ ваде”ӈадонзь: «Тамаляӈгы ты” хава ямб’

нарахад ӈадимы. Пода вэва, ты” ха”. Вэва нумгад ты хусувэхэна нисяты хаӈг, ямб нара, сырэйда тецьвы».

Лев Сэротэтто, харта ты пэртя, Яр-Саля’ выӈгана илена: «Тама’ савасе, нись ядембю’. Нарэйхад ты” вынхалуйць, ныхы-

сиць. Теда’ савовна хадырӈа”. Пардон мал” ӈабтэйнаць».

Владислав Салиндер, МоП «Ярсалинское» 3-эй ӈэсы’ пастук: «Та’ ядем- баркаяӈасе. Неняӈг” иры’ ямбан’ ядембись. Тарця яляхана ты” ниць хадыр”. Тедахав’ хаця’ савума. Теда’ маня” бригадава’ «южныйӈэ» хая. Мюслабина” несэйма”. Маси’ ты”на” хадырць я’ савумда». Ямал’ яна’ выӈгана ям’ тохоламбада

тарем’ лахана” – ты” ӈока ӈэва’ нид, няда’мер” сусананна, тахаӈга. Тиканда ям’ тохоламбада” луца” ты” хадырць ям’ манэсарӈа”, ханяна нядада хурка, ты” ӈаманда танянакы, юӈгодакы. Ӈамгэ няда сусавы, сяӈок ты я’ нина хадырць пиртадо’, тикасавэй тохоламбидо’, манэсарӈадо’.

Эдуард Худи, МоП «Ярсалинское» 1-

ей ӈэсы’ бригадир: «Маня” ӈэсыхынана’ тына” нылэйд. Хадырць ява’ сава. Суюна”таня”».

Алексей Салиндер, харта ты пэртя,

Яр-Саля’ выӈгана илена: «Тына” сава” тюку’ по’. Небой по’ вэвась. Маня” мюсярць ява’ несэймдаваць. Нярм’ явна недармава’

миӈа. Тедари’ тюку нядэй яхана ӈава”. Няда’ тедари’ таняӈо’, ханяӈы” яхана тяню. Няда янамбовна вадёднив’, мунця’ то”олха

вуниӈа. Суюна” таня”, ӈока ниӈа’. Ӈарка тына’ хабарманзь митына”. Пастукна’ пеля нядэ. Пыдо’ мюсе тыдо’ тяню. Тарехавм’

илева’ то”олха, саво». Ӈани’ ӈоб’ мяк” ӈамдына”. Тюкохона Яр-Саля’ нюртей ӈэсы’ пеля иле”. Пыдо’ нара’ няна тэсипой’ хаёвы”. Теда’ мюсе хабтадо’ юӈгодарха, ӈадъбято’ пыдо’ нядэ”. Нядэна” ӈопой яхана ни’ ӈамдю”, та’ ямбдан’ манзаядо’ ӈока. Хасава” мирӈа”, не” сэдора”, мяд’ манзаям’ минре”.

Наталья Худи, тэси хаёвы, харта Яр-Саля’ выӈгана илена: «Маня” тедахав’ харна” иленава”. Тэси” хаиваць. Тёнякуй ни-

на” ӈэсыхына манзра”. Нямэхэна сидна” нядабиць, Валерий Сойкович турӈась, ӈамгэри тэврась. Перасин ня”маваць».

Денис Худи, ты пэртя, Яр-Саля’ вынгана харта илена: «Нядахавар ёрява. Сыра’ салаба’ ӈылна хаюрӈа. Ёря сыра’

ӈылна хаюрӈа. Выӈгана хусувэй яля’ хад ӈэсетынё”. Яв’ тяхана мэван’ харваӈгудамсе. Тарця нядми’ хось я”мадм’. Таӈота сыри-

та манзьван таняна иле пиртав».

Андрей Кугаевский, Ямальский районм’ минрена: «Хэвы ядэро”мава’ тара.

Мань манэ” ӈав, намдав, ты пэртя” ханзер” тандо’ мадавэдо’. Ты пэртя” харто’ лахана”, тад нерняю” ханзер” илеӈгу”. Тэси” хаёвы

ни” ӈапамбю”. Пыдо’ тасламбидо’. Ханзер” ӈэсь тара. Ямальский район’ тиӈгэвна 400 мяд’ терм’ нядаваць. Тикы” е”эмня 8 млн еся

ӈадимдеваць, 29 бензин’ тоннам’ миӈаваць. Тикы’ хавна яв’ тяхад ненэцяи мюсе нядабиваць. Вездеходха”на мядо’ нерня’ несэй ян’ тэврэйнаць. Нара’ ты” ныхысялмаць». Ӈули’ пуда Панаевск’ выӈгана иленаха” тэворӈаваць. Пыдо’ ӈобтарем’ хуркари тоянана серк’ тебермы”. Теда’ намдхава”, ханзер” тандо’ хэвы, тыто’ хадырць я хурка ӈэдакы.

Николай Сэротэтто, Панаевск выӈгана илена ты пэртя: «Тына” хаӈгураркаяӈа, мэдаць. Ныла”мадо’ юӈгу”. Маня” мюсярць

яханана’ нядава’ тяню. Ядембадахана тына” ёльце няватарца”ма. Ява’ тянюмя, няда суса. Нара’ тына” ӈокавна хаць. Танзавэй сырасавэй яв’ тяхана манзьван иле нив пиртэ. Ты” харто’ пуняю” ёнда турта”».

Аркадий климов, МоП «Панаевс-

кое»’ ты” лекар: «Тама’ савась. Тына” саць нид’ ныла”, нарада тоянась. Тына” мал” лекаратэйна”. Ӈопой-сидя хаӈгурта ты. Сы-

ранда ӈэсонд’ тына” нылангуд”». Танда Ямал’ яна’ тиӈгэвна хуркари ӈэвы. Ханяӈэхэна саць ядембавы, ӈани яхана нумда сава ӈэвы. Ненэцяи” ханяӈыто’ тыдо’ савовна нылавыд, ӈанит тамна

ябтарка”. Ханяӈы” суюси’ хаёвы”, ӈани” ты пэртя” суюдо’ таня”. Ӈамгэ тарця? Ты” сензӈэва ненэцялихад ни пере. Нум’ хурка, я’

хурка, тад тикы’ хавна, ты пэртя ханзер” тыда маниейда, ханзер” ма”алку. Вы’ тер” харто’ теневахава тенева”ма, ханзер” ты”

лэтамба тара”, ханзер” ма”алко тара, хурка явна мюсеӈгу”, сяха’ ямданаӈгу”. Маси’, теда’ ненэй ненэцяи” яля’ падар”манна миндя несэй по’ вы’ терхана сава ӈэӈгу.

 

Антонина Серасхова, лахарёна’ пелям’ тад тованда газетахана толангура